01.10.2012
Aðalfundur foreldrafélags Brekkuskóla fór fram 25. september sl. Mæting á fundinn var mjög góð miðað við
síðastliðin ár en rúmlega 50 manns mættu á fundinn. Skólastjórnendur og stjórn foreldrafélagsins þrýstu mjög
á foreldra í ár að mæta á fundinn með fréttatilkynningum og formaður foreldrafélagsins mætti á skipulagða kynningarfundi
í haust til að minna á fundinn.
Sigrún Sveinbjörnsdóttir, dósent við HA flutti erindi um mikilvægi virks samstarfs foreldra og skóla en rannsóknir sýna að gott
samstarf þessara aðila hefur góð áhrif á námsárangur, viðhorf til skólans og líðan nemenda. Sigrún ræddi einnig um
ábyrgð foreldra á börnum sínum og mikilvægi góðra samverustunda foreldra og barna.
Stjórn foreldrafélagsins vill sitja áfram en hvatti jafnframt fleiri til að koma í stjórn. Tvær mæður buðu sig fram til
stjórnarstarfa þær Ragnheiður Halldórsdóttir og Bryndís María Davíðsdóttir. Tólf fulltrúar munu því
sitja í stjórn í vetur en einnig fór fram kosning í embætti tveggja endurskoðenda og því embætti gegna nú Sigurður
Jónsson og Helgi Svavarsson.
Á fundinum var tillaga að nýju deiliskipulagi í kringum skólann rædd en fundurinn ákvað í kjölfar mjög góðrar
umræðu að halda sérstakan fund um tillöguna mánudaginn 1. október kl. 20. Pétur Bolli Jóhannesson, skipulagsstjóri bæjarins
mun mæta á fundinn og fara yfir tillöguna, taka á móti tillögum frá fundargestum og svara spurningum þeirra.
Stjórn foreldrafélagsins hvetur foreldra til að mæta á fundinn þar sem um er að ræða öryggi barnanna á leið í og
úr skóla.