Fréttir

Brekkuskóli gerði sér lítið fyrir og fór með sigur af hólmi í Skólahreysti. Keppnin var haldin í Íþróttahöllinni og þar kepptu nemendur í grunnskólum Akureyrar sín á milli í hinum ýmsu greinum sem reyna á kraft, styrk og þol keppenda. Liðið okkar skipuðu Birnir Vagn Finnsson, Saga Margrét Blöndal, Magnea Vignisdóttir, Sævaldur Örn Harðarson, ásamt Maríu Arnarsdóttur og Einari Ingvasyni. Þjálfari þeirra hann Jói Bjarna hefur stutt dyggilega við liðið sem hefur lagt afar hart að sér við æfingar í vetur og uppsker nú eftir því. Áhorfendur skemmtu sér konunglega í Höllinni og voru skólanum til sóma.

Í gær og dag héldu nemendur á mið og unglingastigi hæfileikahátíð þar sem nemendur stigu á stokk með fjölbreytt og skemmtileg atriði.

Pangea stærðfræðikeppnin var haldin í þriðja sinn hér á landi laugardaginn 17. mars síðastliðinn.

Rakel Helmsdal rithöfundur frá Færeyjum heimsótti 6. - 10. bekk í Brekkuskóla í dag. Hún las upp úr bók sinni:,,Hon, som róði eftir ælaboganum”, sagði frá sjálfri sér og bókinni ásamt því að greina frá tilurð bókanna um stóra og litla skrímslið en sú nýjasta: ,,Skrímsli í vanda” fékk íslensku bókmenntaverðlaunin í ár.

Brekkuskóli tók þátt í lokahátíð Stóru upplestrarkeppninnar sem haldin var í Kvosinni í Menntaskólanum á Akureyri. Það má með sanni segja að allir keppendur hafi staðið sig vel og var unun að hlusta á fallegan upplestur hjá nemendum í grunnskólunum á Akureyri. Fulltrúar Brekkuskóla voru þær Arnfríður Kría Jóhannsdóttir og Steingerður Snorradóttir og varamenn þeirra þau Guðrún Bergrós Ingadóttir og Tómas Óli Ingvarsson. Þau stóðu sig öll vel og tryggði Arnfríður Kría okkur þriðja sæti í keppninni. Þess má geta að nemendur úr Brekkuskóla tóku einnig þátt í tónlistarflutningi á hátíðinni. Við erum óendanlega stolt af okkar fólki.

Í dag fagna nemendur í 1. bekk degi 100 í skólanum:-) Nemendur og starfsfólk hélt daginn hátíðlegan með því að fara í skrúðgöngu um skólann og gæða sér á góðgæti sem nemendur söfnuðu í skreytta bréfpoka. Unnið var á fjölbreyttan hátt með tugi og auðvitað 100 og að sjálfsögðu var búið að skreyta skólann í tilefni dagsins. Við óskum nemendum í 1. bekk innilega til hamingju með daginn og erum óendanlega ánægð með hópinn. Sjá má nokkrar myndir frá deginum hér á heimasíðunni.